Кветослава Копорова, за слободна Головачова
Народила ся в Снинї дня 25. юла 1964 родічім Михайлови і Аннї Головачовым, котры обидвоє походили із Пчолиного – 10 км од Снины, родного села Кветославы Головачовой, единой дїтины своїх родічів. Мати ся за слободна кликала Біндзарoва, дїдо Кветославы (по матери) походив із Руського.
В Пчолинім выходила в роках 1970 – 1978 вісем років словацькой Основной девятьрoчной школы і в роках 1978 – 1982 абсолвовала ґімназію в Снинї (україньску класу).В роках 1982 – 1987 абсолвовала Філозофічну факулту УПЙШ в Пряшові, учітельство україньского і словацького языка і літературы. Нїґда тоты языкы не учіла, но знаня україньского языка вывжыла в роках 1987 – 1992 як редакторка тыжденника „Нове життя‟. В роцї 1987 здобыла тітул ПгДр. в одборї україньскый язык.
ПгДр. Кветослава Копорова, Пгд., універзітна доцентка – як редакторка Русина і Народных новинок і як высокошкольска учітелька
1992 – 2002 – редакторка і новинарька в редакції місячника Русин і тыжденника Народны новинкы
2002 – януар 2007 – Кветослава Копорова зістала дома і старала ся о старшу дїтину Мішку, дївочку, котра была автістка і котра в роцї 2007 передчасно умерла. Друга дївочка Моніка є днесь зубарьков в Празї.
апріль 2007 – фебруар 2008 – одборна асістентка на Інштітутї реґіоналных і народностных штудій Пряшівской універзіты в Пряшові, на ёго Оддїлїню pусиньскогo языка і културы ПУ
2008 – 2015 – высокошкольска вчітелька – одборна асістентка на Інштітутї русиньского языка і културы ПУ в Пряшові
2007 – 2012 – екстерны докторандьскы штудії на Філозофічній факултї ПУ в Пряшові
2012 – здобытя тітулу ПгД. в одборї Славянськы языкы і літературы
2016 – доднесь – высокошкольска вчітелька – одборна асістентка на Інштітутї русиньского языка і култруы ПУ в Пряшові, котрый є од року 2015 єдным із трёх інштітутів Центра языків і култур народностных меншын ПУ в Пряшові
2022 – до сучасности – на тім самім інштітутї, в тім самім Центрї – высокошкольска вчітелька на функчнім містї доценткы.
Одборне і умелецьке заміряня Кветославы Копоровой як науковця в области русиньской лінґвістікы: сучасный русиньскый язык – фонетіка і фонолоґія, морфолоґія, лексіколоґія, орфоґрафія, орфоепія, нормотворїня, функчны области сучасного русиньского літературного языка – літературна сфера.
Научны семінары із карпаторусиністікы отворены про шыроку громаду
Научны семінары із карпаторусиністікы суть отворены про колеґів лінґвістів, історіків…, но і про шыршу публіку. Першым выступаючім гостоём быв проф. Маґочій. На зачаток, першый семінар КР 12.2.2009 і другый в роцї 2010 (15. рoчніця кодіфікації РсЯ) вела Анна Плїшкова. Кветослава Копорова презентовала найновшы выданя з карпаторусиністікы, потім ся черяли, коли котра могла і мала добрый тіп на выступаючого і од року 2014 їх веде вже Кветослава Копорова. В яри, в роцї 2024 приправила і одмодеровала 60. семінар. Концём рока 2023 вышов 15. рочник научного зборника iз семінарів за рік 2023.
Научно-штудійны стажы Кветославы Копоровой
8-9/2012 –штудійна стаж на Торонтьскій універзітї в Канадї заміряна на научне баданя в области карпаторусиньскых штудій
4-5/2014 –штудійна стаж на Торонтьскій універзітї в Канадї заміряна на научне баданя в области карпаторусиньскых штудій
9/2014 – штудійна стаж на Торонтьскій універзітї в Канадї заміряна на научне баданя в области карпаторусиньскых штудій
4/2018 – позвана лекція на Карловій універзітї в Празї і штудійна стаж на Чеській академії наук заміряна на баданя в области карпаторусиньскых штудій
9/2018 – штудійна стаж в рамках проґраму Erazmus+ , проґрам школїня на Научнім інштітутї А. Годинкы в Будапештї
4/2024 – штудійна стаж в рамках проґраму Erazmus+ , проґрам школїня на Западочеській універзітї в Пылзню, на ФФ – Катедрї нїмецького языка і выходославяньскых штудій і на Педаґоґічній факултї – Катедрї чеського языка і літературы
Кветослава Копорова як председкыня Сполку русиньскых писателїв – од року 2010
В роцї 2010 ся Кветослава Копорова стала председкынёв Сполку русиньскых писателїв (СРП). Вызначнов актівітов сполку є выголошованя літературного конкурзу Марії Мальцовской і наслїдно удїлёваня цїны Марії Мальцовской за найлїпшый умелецькый твір в pусиньскім языку. Ку тому Сполок выдає і публікації умелецькой і одборной літературы в русиньскім языку.
В роцї 2015 была Кветослава Копорова оцїнена Цїнов святого Кіріла і Мефодїя за розвой русиньского языка, котру удїлює Меджінародный конґрес русиньского языка і Карпато-pусиньскый научный центр в США.
Публікачна дїятельность Кветославы Копоровой (Выбер із публікацій)
Моноґрафії
AAB01 Jabur, V. – Plišková, A. – Koporová, K. (2015). Gramatyka rusyňskoho jazyka. Prešov: Vydavateľstvo Prešovskej univerzity. 327 s. ISBN 978-80-555-1448-2.
AAB02 Jabur, V. – Plišková, A. – Koporová, K. (2019). Rusyňskyj jazyk. Kompleksnyj opys jazykovoj sіstemŷ v konteksťi kodifikaciji. Prešov: Vydavateľstvo Prešovskej univerzity. 476 s. ISBN 978-80-555-2243-2.
Высокошкольскы учебникы
ACB01 Koporová, K. (2015). Fonetika, fonológia a akcentológia rusínskeho jazyka. Vysokoškolská učebnica. Prešov: Prešovská univerzita – Ústav rusínskeho jazyka a kultúry. 115 s. ISBN 978-80- 555-1277-8.
ACB02 Plišková, A. – Koporová, K. (2015). Rusyňskŷj jazŷk pro čudžinciv. Prešov: Prešovská univerzita – Inštitút rusínskeho jazyka a kultúry, 172 s. ISBN 978-80-555-1390-4
ACB03 Plišková, Anna – Koporová, Kvetoslava (45%) – Jabur, Vasiľ (2029): Pravidlá rusínskeho pravopisu s ortografickým a gramatickým slovníkom/Pravyla rusyňskoho pravopysu z ortografičnŷm i gramatičnŷm slovnykom. Vysokoškoľskŷj učebnyk. Prešov: Vydavateľstvo PU, 544 s.
ACB04 Plišková, Anna – Koporová, Kvetoslava (60%), a kol. (2021) Pravidlá rusínskej výslovnosti s ortografickým a gramatickým slovníkom/Pravyla rusyňskoj vŷslovnosty z ortoepičnŷm slovnykom. Vysokoškoľskŷj učebnyk. Prešov: Vydavateľstvo PU, 300 s.
Учебны тексты про штудентів (скріптум)
BCI01 Plišková, Anna [UKOEXIF] (50%) – Koporová, Kvetoslava [UKOEXIF] (50%): Rusiňskŷj jazŷk pro začatočnуkiv. – 1. vyd. – Prešov : Prešovská univerzita, 2011. – 196 s. ISBN 978-80-89441-17-4
BCI02 Plišková, Anna [UKOEXIF] (40%) – Koporová, Kvetoslava [UKOEXIF] (30%) – Eddy, Eva (30%): Hovoríte po rusínsky? = Bisjidujete po rusiňsky? = Do you speak Rusyn? [elektronický zdroj]. – 1. vyd. Prešov : Prešovská univerzita, 2016. – 188 s.[online] ISBN 978-80-555-1747-6
Окрем того Кветослава Копорова публіковала веце як 50 штудій в научных зборниках на
Словакії, Польщі, в Мадярьску, на Українї, в Молдавії, Японії, Булгарьску і в Сербії.